What is the distance between heaven and hell Story

میں نے مولوی صاحب سے مدرسے کے طالب علموں کے تصویریں بنانے کے لئے خصوصی اجازت مانگی تو انہوں نے خوشی سے اجازت دے دی۔ ساتھ میں یہ بھی شرط رکھی کہ چھوٹے بچے اور بچیوں کی تصاویر لے سکتے ہیں مگر بڑی طلباء کی تصاویر نہ لیجئے گا۔

مولوی صاحب کی طرف سے اجازت ملنے کے بعد میں  دیوار کے ساتھ ٹیک لگا کر بیٹھ گیا اور طلباء کو جانچنے لگا کہ کہیں سے کوئی ایک آدھ اچھی تصویر بن جائے۔

مجھے بیٹھے ابھی تھوڑی ہی دیر ہوئی تھی کہ میرے قریب دو بچے آکر بیٹھے۔ اور آپس میں بات چیت کرنے لگے.

وہ بچا جیسے ہی بیٹھا تو میں نے فوراً ایک تصویر کھینچ لی۔ میری رائے میں ، ایک ہی کلاس کے دو طلبا کے ساتھ بیٹھنا اور خاموش رہنا ناممکن اور غیر یقینی ہے۔ تو بیٹھتے ساتھ ہی وہ دوںوں آپس میں مولوی صاحب کے ڈر کی وجہ سے کھسر پھسر کرنے لگے۔ میں نے ان کی عمر کے بچوں کے مابین اس طرح کی دل دہلانے والی گفتگو کبھی نہیں سنی۔ ان کی تکلیف دہ گفتگو نے مجھے تصویروں کے تصورراتی دنیا سے باہر نکال کر حقیقی دنیا میں داخل ہونے پر مجبور کر دیا۔ اب ذرا ان طلباء کی گفتگو سنتے ہیں۔ 

پہلا بچہ : تم دیر سے کیوں آئے ہو؟ استاد ناراض ہو رہا تھا۔

دوسرا بچہ : میں ناشتہ کا انتظار کر رہا تھا۔۔۔

پہلا بچہ : تو پھر تم نے کھانا کھایا؟ اور یہ روٹی مسجد میں کیوں لائے ہو؟

تو دوسرے بچے نے معصومیت سے جواب دیا کہ ۔۔۔ امی کہتی ہیں کہ فی الحال یہ تھوڑی سی روٹی لو،  جلدی سے مسجد جاؤ اور وہیں جا کر کھا لینا۔۔۔۔مسجد سے چھٹی کے بعد جب آئو گے تو کھانا کھا لینا۔

عموماً مدرسے کے بچوں کو ۱۱ بجے تک چھٹی ہو جاتی ہے۔ تو اس کا مطلب یہ ہوا کہ رات کے کھانے سے لیکر دوپہر تک اس بچے نے اسی ٹکڑے پر ہی رہنا تھا۔ 

دوسرا بچہ : نہیں، میرے حصے میں بس اتنا ہی آیا ہے؟ اس نے اپنے ہاتھ میں باسی روٹی کا ٹکڑا دکھایا اور اسی کو اپنی ران پر رکھ دیا۔

پہلا بچہ : اچھا اس میں تھوڑی سے مجھے دے  دینا، مجھے بھی بہت بھوک لگی ہے۔

دوسرا بچہ: کیا تم نے بھی کھانا نہیں کھایا؟

پہلا بچہ: ہاں، بہت بھوک لگی ہے اور بھوک میں حروف بھی نظر نہیں آ رہے.

دوسرا بچہ:  اچھا یہ آدھی روٹی میں لے لیتا ہوں اور آدھی تم لے لو۔

اب دونوں چوتھائی کا آدھا حصہ کھانے کے ساتھ ساتھ پڑھ بھی رہے تھے

اسی بات مجھے خواجہ غلام فرید کا شعر یاد آگیا کہ: 

پنج رُکن اسلام دے ، تے چھیواں فریدا ٹُک

جے لبھے نہ چھیواں، تے پنجے ای جاندے مُک

اردُو ترجمہ: اسلام کے پانچ رُکن بیان کئے جاتے ہیں۔ لیکن اے فرید ! ایک چھٹا رُکن بھی ہے اور وہ ہے۔ ۔ ۔ ۔ ’’ روٹی ‘‘ اگر یہ چھٹا نہ مِلے، تو باقی پانچوں بھی جاتے رہتے ہیں۔

تھوڑی دیر بعد بچوں کی جھرمٹ میں بیٹھے مولوی صاحب کسی بچے کو جنت اور دوزخ کے بارے میں بتانے لگے تو وہ بات ان بچوں نے بھی سن لی. اب ان کی گفتگو کا موضوع بھی تبدیل ہوگیا۔ 

پہلا بچہ پوچھتا ہے کہ، یہ جنت اور دوزخ کیا ہے؟

 دوسرا بچا جو روٹی کا ٹکڑا ساتھ لایا تھا۔۔۔اس کا جواب بے حد معصومانہ اور لاجواب کر دینے والا تھا. اس بچے نے جواب دیا کہ ۔۔۔۔ امی کہتی ہیں کہ۔۔۔۔میرے لعل  جنت میں بہت روٹی ہے کھانا ہے، پینا ہے ۔۔۔ اور تو اور وہاں کھانے کا انتظار بھی نہیں کرنا پڑتا۔۔۔۔ جب کہ دوزخ میں غربت ہے، بھوک ہے پیاس ہے اور وہاں اتنی بھوک ہے کہ لوگ بھوک سے مر رہے ہیں۔

پہلے بچے نے ایک اور سوال کیا کہ۔۔۔۔ ہم جنت میں کب جائیں گے؟ 

دوسرے بچے نے کہا کہ ۔۔۔۔  جنت بہت دور ہے بہت بہت دور ہے ۔۔۔۔ جب ہم مریں گے نا تب ہی ہم جنت میں جائیں گے۔ 

وہ اپنے چھوٹے چھوٹے ہاتھوں کو بہت زیادہ پھیلا کر جنت کا حجم اور فاصلہ سمجھا رہا تھا۔ 

پھر وہی بچہ جو روٹی کا ٹکڑا اپنے ساتھ لایا تھا خود ہی سوال کرتا ہے کہ۔۔۔۔۔ پھر  ہم کب مریں گے؟

پتا نہیں۔۔۔۔   دوسرے بچے کے جواب کے بعد مولوی صاحب کی زوردار آواز گونجی کہ ” کیا باتیں کر رہے ہو پڑھنے پر دھیان دو” اور پھر وہ زور زور سے الف با تا ثا پڑہنے لگے۔

ایک دانا شخص سے کسی نے پوچھا کہ ۔۔۔ جنت اور دوزخ کے درمیان کتنا فاصلہ ہے۔

دانا شخص نے ایک طویل خاموشی کے بعد ایک دلخراش فقرہ کہا کہ ۔۔۔ 

بھوک اور پیٹ بھر کر کھانے جتنا